3:55 AM
Abdullah (Hamba Allah)
SALAWAS Palui madam kabanua urang inya kada sawat lagi mahaul aruwah abah wan aruwah umanya, makanya wayah inya bulik kabanua imbah musim haji tadi lalu baungkara handak mahaul jama. Makanya inya sakaluargaan barunding mamastiakan hari salamatannya, lalu siapa-siapa nang disaru wan mamikirakan napa makanannya.Jadi barunding sakaluargaan ini karna handak babagi tugas wan babagi urunannya, siapa nang manyadiakan baras, iwaknya hayam atawa daging atawa hintalu.Imbah ditantuakan harinya maka masing-masing kaluarga manyumbang sasuai wan bagiannya.
= Bus ujar Palui, aku minta tulung ikam supaya basaruan warga sa-erte-an gasan mahaul jama malam jumahat kaina.
+ Kira-kira barapa puluh samunyaan ujar Garbus batakun.Aku batakun ini supaya cucuk wan parsadiaan ikam karna dahulu wayah ikan basaruan salanggaran haja ada nang kada sawat ujar Garbus.
= Sakali ini kami ba aruhan baganalan handak mambayar nazar sudah dua talu tahun kada mahaul, makanya kami batuturuk bahan sapadangsanakan.Jadi ikam kada usah hawatir saru haja salanggaran wan sa-erte-an ujar Palui.
KAMUS SI-PALUI
WAYAH malam mahaul itu imbah tuntung mangaji, mambaca yasin wan batahlil,doa lalu langsung basusurung makanan.
- Cuba tangguh makanan ini napa iwaknya ujar Tulamak.
+ Mudahan kada kaya samalam, iwaknya cuma banyu sup wan kicap ujar Garbus.
- Tangguhanku musti hayam mati nang dimasak, hayam mati karna disumbalih ujar Tuhirang mahuhulut.
+ Wah......susurungan ini ngalih ditangguh karna iwaknya dipatak dalam nasi kaya urang baaruhan di pahuluan ujar Garbus.
LALU imbah tuntung makanan, masing-masing bakisah tanyata iwak dalam nasi nang disurung kada sama.
+ Aku hintalu masak habang ujar Garbus.
- Aku iwak garih batanak sahut Tulamak,
= Aku lain lagi, sambal guring hati ujar Tuhirang.
+ Kanapa maka basalamatan kada sama iwaknya ujar Garbus batakun wan Palui.
= Maka samalam sudah kusambat bahwa baaruhan ini urunan bahan makanan jadi tagantung masing-masing kaluarga nang mambarinya sahut Palui.
+ Dasar Palui kada kukurang akal supaya kada banyak biayanya ujar bubuhannya.
Imbah tuntung makanan lalu bubuhannya handak bulikan, tapi ditahan Palui satumat.
= Aku handak basadakah wan sampiyan sabarataan ujarnya, lalu Palui mambagi bungkusan palastik sabungkus saurang baisi kurma.
+ Alhamdulillah tamakan kurma ujar Garbus.Dimana ikam dapat kurma banyak banar kami sabugkus saurang ujarnya.
= Inilah barkat kami banyak bakabun kurma sahut Palui.
- Dimana Lui andak kabun kurma ikam itu ujar Tulamak.
= Kabunnya jauh tabagi dimana-mana, ada di Jeddah, ada di Madinah wan ada jua di Makkah sahut Palui mantap.
+ Wah sugih banar kaluarga Palui, kaluarga siapa ampunnya.
= Kaluarga Arab disana, kaluarga bubuhan arab jua........ aku cuma umpat manukar haja ujar Palui.
+ Dasar Palui dimana-mana ma-akal taruuusss....ujar bubuhannya basurakan.
Palui Bakacamata
BULAN bajalan bulan, tahun bajalan tahun kada karasaan Palui makin batuha walaupun inya marasa kadada parubahan.Tapi nang musti awak makin babungkuk rambut di kapala makin mamutih wan bajalan sudah kada tapisah tungkat lagi.Kaya itu jua mata pina makin bakabur kada kawa lagi mambaca.
Karna kada paminanduan wan rancak tasalah itulah maka bininya manyuruh Palui supaya bakacamata haja.
+ Pian kak ai baiknya bakacamata haja, supaya jangan tasalah panglihat maklum sudah kaur, ujar bininya.
= Aku akur haja ding ai, supaya panjanak makin tarang wan supaya kalihatan makin aksi sahut Palui.
+ Biar batambah aksi kadada jua nang cagar handak wan sampiyan karna samuyaan sudah saraba lamah sahut bininya. himung
KAMUS SI-PALUI
Palui tulak ka duktur bapariksa mata lalu dapat risip kacamata. Alhamdulillah sudah bapanglihat saraba ganal ujarnya.
= Pilihakan kacamatanya nang dua warna supaya kawa dipakai siang malam ujar Palui.Imbah bulik ka rumah galu banar bininya kanapa maka manukar kacamata nang kaya anak muda haja.
+ Kacamata sampiyan itu pina kaya pamain band urang picak haja ujar bininya sarik.
= Tapi nang musti panglihatku wayah ini disamping makin batarang, ikam ding ai pina makin babungas, awak makin bakancang kaya wayah kita hanyar kawin dahulu ujar Palui.
+ Kada usah ma ambung, kalu handak malam kaina kubari haja sahut bininya.Ini nah aku asa gagaringan awak abahnya ai kalu kawa tulung pang ikam tulak ka pasar manukar iwak gasan makan tangah hari ini ujar bininya manyuruh.Kalu dahulu kada hakun disuruh karna alasan mata kada tapi hawas maka imbah bakacamata ini kira-kira kadada alasan lagi ujar bininya pulang.
= Akur haja aku disuruh kapasar salajur ba agak kacamata wan kakawalan ujar Palui.Lalu inya maambil sapida mahalunyur ampah ka pasar.Di tangah jalan batamuan wan Garbus, lalu Garbus managur :
+ Handak kamana Lui pina laju banar maninjak sapida ujar Garbus marawa. Rupanya karna kalajuan basapida kada tapi mandangar tatakunan Garbus lalu langsug manjawab :
= Kacamata hanyar haraganya salawi ribu sahut Palui.
+ Dasar Palui sudah mangalilu ditakuni handak kamana dijawabnya kacamata hanyar ujar Garbus dalam hati.
Imbah sampai di pasar Palui langsung ka bak iwak, malihat iwak pina ganal-ganal kalacungan lalu batakun :
= Barapa iwak ini satangguk ujarnya.
+ Dua ribu rupiah samunyaan ujar nang bajual.
= Kutukari samunyaan, bungkusakan baik-baik Palui lalu mambayari langsung bulik kahimungan karna marasa kamurahan iwak haruan ganal-ganal kaya pagalangan itu haraganya cuma dua ribu rupiah haja padahal biasanya nang kaya itu paling murah ampat ribu rupiah sakilunya.
Imbah sampai di rumah Palui malihatakan iwak tukarannya itu lalu bapadah haraganya murah banar.
+ Sampiyan talalu-lalu banar kanapa iwak saluang nang kaya kalingkingan ini maka ditukar mandua ribu rupiah ujar bininya bamamai manyariki Palui.Kalu aku manukar saluang kaya ini haraganya paling-paling lima ratus rupiah.Ini lain haruan tapi iwak saluang abahnya ai ujar biniya.
= Tadi panglihatku kaya iwak haruan ganal-ganal sahut Palui.
+ Buka kacamata sampiyan nang bakaca balur itu, lihati bahimat apakah ini iwak haruan ataukah iwak kalatau ujar bininya.
= Ooooo.......i’ihlah bujur aku tatukar iwak saluang.Ini kada salahku umanya ai tapi salah kacamata ujar Palui sambil minta maaf wan bininya.
Batatangguhan
SUDAH biasa sambil mahadang kamarian bubuhan Palui wan kakawalannya dudukan di warung pakacil Isul, gawiannya kada lain bakisah ka hulu kahilir.Bahanu mamandir pahumaan nang sudah talu bulan karing, mamander hutang di koperasi nang kada kawa bayar atawa mamander bibinian nang bulikan matan pasar.
= Panderan kita ini sabujurnya kada baik karna tabanyak mambajah urang daripada mamuji, bila nang dipander itu mndangar pasti inya cagar sarik itu artinya kita badusa ujar Palui.
+ Jangan talalu disalahakan jua mata kita, maklumlah kita ini manusia nurmal jadi wajar haja tatarik wan bibinian nang langkar wan buritnya nang ganal sahut Garbus.
- Kalu kaya itu supaya kada badusa maka kita batatangguhan haja ujar Tulamak.
+ Nah batatangguhan atawa bacacapatian itu baik karna tamasuk manambah pangatahuan.Ayu Lui ikam mulai manyurung cacapatiannya sahut Garbus.
- Ayu tangguh apa bida bibinian wan sapida ujar Tulamak.
= Itu susurungan lawas nyaman banar Mak ai sahut Palui. Jawabannya bila sapida dikumpa dahulu hanyar dinaiki tapi bila bibinian dinaiki dahulu hanyar dikumpa ujar Palui.
- Nah, satu kusung Tulamak dikalahakan Palui.
+ Aku manyurung mambalasakan Tulamak ujar Garbus.Cuba Lui ikam tangguh apa bidanya gramopon wan bibinian.
= Wah itu tatangguhan nyaman jua sahut Palui.Tapi kanapa maka tatangguhan ikam ini kada jauh wan bibinian.Kalu kaya itu kita tamasuk mamander urang pulang, jadi sama haja dusanya ujar Palui manjawab.
+ Kukira ini kada badusa karna kada manyangkut siapa-siapa tapi manyangkut urang umum.Ayu Lui napa jawabannya tatangguhanku tadi, aku handak mambalasakan kakalahan Tulamak ujar Garbus.
KAMUS SI-PALUI
= Jawabannya ujar Palui, bila gramopon diputar dahulu hanyar diandak jarumnya tapi bila bibinian dijarumi dahulu hanyar diputar sahut Palui.Ayu hitung, ikam badua kalah dua kusung.Kalu tadi ikam manyurung aku nang manangguh maka wayah ini giliranku nang manyurung bubuhan ikam nang manangguh ujar Palui.
- Sasuai wan kahandak ikam Lui ai maka susurungannya jangan sual bibinian ujar Tulamak.
= Aku ini urang alim kada hakun kaya bubuhan ikam pina carubu banar sahut Palui.
+ Surunglah Lui, sakali ini pasti dapat kami jawab ujarnya.
= Susurungannya adalah apa bidanya urang maharu gula dalam cangkir di banjar wan urang maharu gula dalam cangkir di bagau ? Ayu tangguh bila kada dapat ikam badua mambayariakan hutangku di warung ujar Palui.
+ Jawabnya sama haja, dimana-mana urang sama haja maharu gula dalam cangkir wan senduk jawab Garbus wan Tulamak.
= Jawabannya ikam salaaahhhh...... Jawaban nang bujur adalah “urang maharu gula dalam cangkir wan senduk bila di banjar senduknya nang diguyang tapi bila urang maharu gula dalam cangkir di bagau adalah cangkirnya nang mangguyang” ujar Palui.
+ Waaahhhh.......sakalinya Palui carubu wan kidas-kidasnya ujar bubuhannya sambil tatawaan.
Bahaharatan Ubat
MUNGKIN karna matan halus sudah tabiasa tahan bagadang, mandi di sungai wan bahujan bapanas di pahumaan maka Palui wan kakawalannya sampai katuha kada panggaringan.Bila garing paling-paling salismaan wan batukan tapi garing nang kaya itupun kada diaritnya.Bila masuk angin dikaruk wan duit bacampur minyak lamak babawang, bila batukan nginum asam kamal, bila sakit parut cukup dikasai minyak gas.
+ Tuhan sudah manantuakan bila garing pasti ada ubatnya asal hakun bausaha manggawinya ujar Garbus.
= Ilmu kita memang ilmu urang bahari, tapi bila dipikir-pikir masih tapakai sampai wayah ini karna samua ubat wayah ini bahannya pasti matan tanam-tanaman, daun, buah wan akar-akaran jawab Palui.
+ Cuma nang jadi pikiran kita bahwa ubata-ubatan wayah ini haraganya talalu larang hingga kita daripada ngalih manukarnya lalu mancari bahan nang nyamannya haja sahut Garbus.
= Nah, karna itulah maka pamarintah maanjurakan tiap rumah di kampung-kampung supaya maulah apotik hidup ujar Palui.
- Napa itu apotik hidup Lui, baulah apotik hidup itu kada gampang karna kada sadikit duitnya ujar Tulamak batakun.
= Rupanya bubuhan ikam ini kada maumpati caramah kasihatan ujar Palui, jadi kada tahu nang dianjurakan apotik hidup dirumah-dirumah ulih angguta dasa wisma.
+ Maaf Lui lah, kami makin bingung wan istilah-istilah ikam batambah pulang wan dasa wisma ujar Garbus.
= Apotik hidup artinya tanam-tanaman nang ada hasiatnya gasan kasihatan kaya laos, sarai, tipakan, raja bangun-bangun, kambang kanikir, sup-supan macam-macamlah.Kalu dasa wisma artinya kumpulan sapuluh buah rumah tangga ibu-ibu nang ada kagiatan ka trampilan tamasuk gasan baarisan ujar katua RT si Palui.
KAMUS SI-PALUI..
+ Tapi Lui ai bahanu bila digawi urang banyak biasanya tabanyak pandirnya daripada hasilnya.Makanya daripada bangalih-ngalih batanam macam-macam labih baik manukar ubatnya haja di warung, asal ada duit beres ujar Garbus.
= Nah, gara-gara ikam manukar ubat kada tahu manfaatnya itulah maka ikam parak mati sahut Palui manunjuk Garbus.
+ Bujur ujar ikam itu Lui ai, samalam baminggu-mingu Tuhirang ngalih bakamih lalu inya kusuruh nginum air mancur. Sakalinya imbah dinginumnya sabungkus haja sudah lucut banar, kada saling ampihan bakamih tarus sampai wayah ini ujar Garbus.
= Napa sababnya Bus maka bisa kaya itu, kasihan Tuhirang.
+ Sakalinya Tuhirang tanginum jamu air terjun, labih karas daripada air mancur sahut Garbus mangalalak tatawa.
- Tapi lain pangalaman mintuhaku ujar Tulamak.Mintuhaku itu dianjurakan urang supaya jalan batis santai,tapi kada kawa umpat karna sidin baisian panyakit rematik, sakit tulang.Lalu ulih mintuha bini, sidin disuruh manukar ubat cap tiga batis, eeeee..........sakalinya balum habis satangah lusin sudah kawa bajalan kahulu-kahir bahkan sampai tapamalam di pal 18 ujar Tulamak mambalas pandiran Garbus.
= Aku parcaya kisah ikam itu, karna akupun mangalami jua sahut Palui.Aku tapakai ilmu Kadir wan Doyo diiklan tivi nang mamadahakan ubat ginseng TL bila dimakan mata tapajam-pajam ka-nyamanan.Sakalinya imbah kucuba, bujur-bujur kaya lampu neon TL banyala tarus siang malam sampai biniku balum saminggu aku mamakan sudah kasarikan minta sarak, ujar Palui.
+ Kanapa Lui, malah baik kalu basatrum tarus siang malam supaya bini makin sayang ujar Garus batakun.
= Nang ditakutani biniku kadanya satrumnya Bus ai tapi ukurannya nang baganal kaya lampu neon.Karna lampu neon banyala tarus, basatrum tarus itulah maka wayah ini aku tapaksa batapih kada kawa basalawar lagi sahut Palui, maangsul kisah Garbus wan kisah Tulamak.
+ Jadi kalu kaya itu aku akur usul ikam Lui ai supaya kita babulik ka alam mamakan ubat apotik hidup haja, nyaman maulahnya, murah haraganya wan kadada risikunya ujar Garbus.
Surat Sakti
SALAWAS Palui jadi katua RT sudah banyak banar inya mambantu kakawalannya, kada hanya makan minum wan rukunya tapi sagala urusan gasan kaya mambayarakan pbb, pajak radiu, lucis, ktp sampai mambayariakan cicilan hutang di kuperasi.Wajar aku mambantu bubuhannya itu karna bubuhannya tamasuk urang nang banyak bajasa sampai aku kawa tapilih jadi katua RT.Bubuhan Garbus, Tulamak, Tuhirang tamasuk urang nang hakun bamiminggan kada baguguringan bailangi rumah warga kampungnnya wayah handak pamilihan katua RT itu.
= Jadi anggaplah balas jasa, aku tahu diri tapilih karna bubuhannya nang bahimat bausaha kawa mangalahakan Haji Duraup nang wayah itu handak jua jadi katua RT disamping gawiannya jadi pangulu, ujar Palui bapandir wan bininya.
+ Tapi wayah itu ikam adalah baobral janji wan bubuhannya maka maka inya banyak minta bantuan, ujar bininya batakun.
= Aku bagawi wan tapilih karna bujur-bujur diparcaya warga kada karna manyuguk atawa bahambur janji jawab Palui.
Kada lawas imbah Palui bapandir wan bininya datang Garbus mahingal handak minta tulung.
- Lui, ujar Garbus, aku minta tulung ulahakan surat miskin gasan mambawa mintuhaku baubat ka rumah sakit, ujar urang bila ada surat miskin itu kita kada bayar baubat.Kalu kawa tulung ulahakan jangan salambar haja tapi babarapa lambar supaya kawa jua dipakai gasan macam-macam kaparluan, ujar Garbus.
= Jangan hawatir Bus ai, apa haja nang ikam minta pasti kubari, asal aku kawa mambantu.Apalagi hanya minta surat wan tanda tanganku, jangankan salambar, formulir puangnyapun bisa kubari tinggal ikam maisinya gasan kaparluan apa haja, sahut Palui.
KAMUS SI-PALUI
Imbah mandapat surat miskin matan Palui, si Garbus bujur-bujur mamanfaatakannya gasan ka rumah sakit, gasan mamasukakan anak sakulah wan mamulikakan dangsanaknya ka Jawa.Samunyaan kada bayar wan ada karinganan karna ada aturan sosial mambantu warga miskin nang kada kawa bayar.
Kada lawas, Garbus mandangar bubuhan Tulamak wam Tulamak handak mamajuakan kredit sapida mutur.Pinanya samunyaan urusan sudah beres tinggal mahadang panyarahan barangnya.Mandangar habar itu takisir Garbus handak umpat, lalu inya langsung mamajuakan surat-surat lamaran wan maisi formulir kredit sapida mutur nang sudah disadiakan ulih parusahaan.
- Biar aku tadudi dari bubuhan ikam Tuh ai, tapi aku pasti dapat dan kita cagar taimbai maambilnya.Apalagi aku cagar mandapat karinganan haraganya karna aku ada surat sakti matan katua RT si Palui ujar Garbus baagak.
Imbah ada pangumuman bahwa Tulamak wan Tuhirang bisa maambil sapida muturnya, si Garbus taungut karna kada taumpat dipanggil bahkan surat nang ditarimanya hanya pambaritahuan bahwa lamaran Garbus kada kawa dikabulakan, karna dinilai kada cagar kawa mambayar duit cicilannya sampai lima tahun.
= Kanapa maka di tulak Bus, ujar Palui batakun padahal ikam kaya nang lainnya jua sanggup hajam mancicil sampai punah.
- Mungkin salahku jua ujar Garbus marista, dalam lamaran kredit yang kusarahakan wan dilernya kubuati surat nang kuminta samalam.
= Surat nang mana ujar Palui batakun.
- Didalammya kulampirakan surat miskin, sahut Garbus pina supan wan kakawalannya nang masing-masing sudah maingkuti kunci sapida mutur kreditannya
Kapala Kantut
DASAR Palui, biar sudah ditarima jadi pagawai honda kalakuannya kada banyak baubah kaya sabalum jadi pagawai.Sabulan dua bulan pamulaan bagawi rajinnya bukan main, biar kada disuruh sudah lakas manggawi apa nang dilihatnya pina kada biris.Datang sawat banar sabalum kantur dibuka lalu langsung umpat basasapu, mambarasihi mija, mambasuh cangkir bakas nginuman pagawai.Lalu imbah itu tulak ka kantur pos atawa maantar surat ka kantur lainnya.Imbah tuntung langsung bulik ka kantur mamnggani’i gawian pagawai lainnya.Himung kakawalan di kantur ada Palui rajinnya luar biasa.Inya kada hakun bulik sabalum habis jam apel siangnya.
Wayah kadada gawian, pagawai nang lainnya nginuman di warung atawa bajalan ka pasar disamping ada jua nang asyik mambaca surat kabar wan main catur.
+ Lui, ujar kawannya di kantur, cuba pang ikam umpatan main catur karna ujar Garbus ikam tamasuk harat, manang tarus bila bataruh.
= Aku balum wani umpatan kaina aku kada jadi ditarima bila kalihatan kapala bahwa aku kada badisiplin.Daripada aku umpat main catur baiknya aku minta ijin balajar mangatik surat haja ujar Palui.
+ Wayah ini kada musimnya lagi urang mangatik wan masin tik karna sudah jamannya komputer ujar kawannya.
= Biar haja aku katinggalan jaman sabab kalu kada dimulai balajar maka jauh lagi tadudinya sahut Palui.Lalu Palui lituk-lituk mangatik, bauju tunggal hurufan nyaring banar sampai kadangaran ka ruangan lainnya.
- Uiii.... urangnya, siapa nang mambingkil disubalah bunyi kalitukan, ujar kawannya nang lain manyindir Palui.Tapi Palui badiam haja dihuhulut nang lain, dianggapnya angin haja.
Imbah sudah mulai bisa, lalu inya mancuba baulah surat nang ditujuakannya ka kantur pangairan wan pambibitan, karna katua RT di kampungnnya handak minta tinjau hasil usaha parkabunannya.Lalu wayah Palui mangatik, ada kawannya nang malihat tujuan surat itu,lalu inya batakun : kantur apa itu Lui ujarnya.
= Ooooo.... itu kantur panting, pangairan artinya tukang kair sadangkan pambibitan artinya tukang bibit.
- Pantas Palui raja akal, ujar kawannya tadi.
Palui mulai mangatik lagi, tulisannya babunyi : “Kepada Kapala Kantut” di tempat.Lalu imbah suratnya tuntung dimasukakan nya kadalam amplup, dilem lalu dikirimnya.Imbah bulik ka rumah lalu inya bakisah wan katua RT bahwa inya sudah mangirim surat tinggal mahadangi balasannya haja.
Hadang-hadang, kada lawas datang balasannya ka rumah katua RT.Katua RT sanang banar datang balasannya bahwa usaha Palui bahasil, lalu langsung katua RT manyuruh Palui datang karumahnya.
- Lui, ini ada surat balasan, cuba ikam baca aku mandangarakan haja, ujar Katua RT.
= Palui mambuka suratnya lalu mambaca, ada tulisan : mambalas surat sudara nang ditujukan Kepada Kapala Kantut, maka basama ini “dibaritahikan” dan satarusnya................
- Kanapa Lui maka kaya itu balasannya, ujar Katua RT.
= Ulun ampun maaf Katua RT-ai karna samunyaan ini adalah kasalahan ulun jua,salah manulis alamatnya maka jawabannya mahuhulut jua nang babunyi dibaritahikan, ujar Palui pina supan wan Katua RT-nya
Dipukul Hantu
WAYAH lagi anum Palui sampai bujangan Palui wan kakawalannya badiam sa kampung tapi imbah babinian masing-masing ada nang pindah ka kampung lain atawa ada jua nang bacari ka kuta.Karna kampungnya jauh matan kuta maka hanya saminggu sakali bubuhannya tulakan ka pasar.Itupun biasanya barumbungan, bararamian naik sapida mulai subuh lalu parak asyar hanyar bulikan imbah habis manuntun biskop.
= Walaupun kami sarantang saruntun ka pasar tapi ada jua wayahnya kami kada taimbai karna masing-masing ada kasibukan dirumahnya ujar Palui bakisah wan bininya.
+ Wani hajalah sampiyan saurangan ka pasar padahal jauhnya bapuluh pal matan wadah kita ini sahut Palui.
= Kalu jadi lalakian pantang pamburisit, kaina dipadahakan urang bancir ujar Palui.
+ Maksud ulun kadanya bawawanian bakalahi tapi kalu pina kapacahan ban, pagat rantai sahut bininya kada hakun kalah.
= Kada apa-apa umanya ai, karna siang hari banyak haja urang lalu lalang jadi wani haja kalu tapintang saurangan.Tapi ada pang pngalamanku wayah lagi bujangan tadi, ujar Palui bakisah.Kisah ini adalah kisah lagi anum wayah zaman japang, wayah zaman saraba sakit balum ada taksi padesaan kaya wayah ini, ujarnya.
Wayah itu aku ditinggalakan kakawalan tulak ka pasar malam di kuta.Karna kahandakan malihat karasmin maka kutulaki saurangan manyusul bubuhannya. Wayah itu malam jumahat hujan rintik-rintik aku tulak manyusul bubuhannya imbah magrib.
+ Naik apa sampiyan malam-malam ka kuta, ujar bini Palui.
= Ya kaya biasa basapida buruk itu pang sahut Palui.Karna hujan rintik-rintik apalagi jalanan kadap banar maka kutinjak sapida laju-laju.Di jalanan sunyi banar kadada tatamu atawa taimbai urang lain, jadi tapaksa manguatakan hati bawani, daripada kahandakan malihat karasmin, ujar Palui.
+ Tapi aman haja kalu di jalanan, nang bini batakun.
= Itulah nang jadi kisahnya, ujar Palui.Balum sampai di simpang tiga paharatan laju maninjak sapida, mantakup aku di pukul urang.Dalam hati aku bapikir siapa nang mairingi aku lalu mamukul matan balakang.Ini kuanggap urang kada wani karna mamukul bacuntan sebab kalu mamukul matan hadapan pasti kalawan biar bamatian kusanggupi ujar Palui.
+ Kira-kira ada sual bibinian kalu, ujar bininya.
= Nah...... curiga kalu sahut Palui.Aku lagi anum samasakali kada hakun tahual sual bibinian karna kuanggap manyupanakan. Imbah dipukul tadi aku tagulung katanah lalu kucari siapa urangnya nang mamukiul bacuntan tadi.Tapi imbah kucari bakuliling kadada jua tadapat siapa urangnnya, lalu aku bapikir : aku ini pasti dipukul hantu apalagi wadah aku rabah tadi parak kuburan bahari, ujar Palui bakisah.
+ Jadi sampiyan parcayalah dipukul hantu, ucap bininya.
= Eeeee....... sakalinya imbah kulihat kabalakang, ban balakang sapidaku pagat lalu karna kalajuan langsung mahambat kabalukukku.Maklumlah wayah zaman japang itu ban sapidanya adalah ban buta, apalagi sapidaku kada baancak wan kada basalibur jadi langsung mahukumakan kaawak, ujar Palui bakisah.
= Mangalikik bini Palui tatawa mandangar kisah lakinya tentang sapida ban buta di zaman japang, maklumlah zaman susah balum mardika ujarnya.
0 tanggapan:
Posting Komentar